Бишкекте 14-15-декабрь күндөрү президент Садыр Жапаровдун катышуусунда «Мурас» футболдук турнири өтөт. Бул тууралуу Кыргыз футбол союзу маалымдады.

Иш-чара «Газпром» спорт комплексинде жана Каба уулу Кожомкул атындагы спорт ордосунда өтүп, ага 16 команда катышат.

Турнирдин жобосуна ылайык, командалар 4 тайпага 4 командадан бөлүнөт. Тайпалык баскычта бир тур ойноп, андан соң финалдык этапка чыгат.

Беттешке төмөнкү командалар катышат:

президенттин командасы;

маданият өкүлдөрү — «Өнөр»;

белгилүү ишкерлер — «Бизнес»;

массалык маалымат каражаттарынын өкүлдөрү – «Журналисттер»;

футбол ардагерлери – «Алга»;

спорт федерацияларынын жетекчилери — «Спорттук федерациялар»;

Жогорку Кеңештин депутаттары — «Жогорку Кеңеш»;

президенттин аймактардагы ыйгарым укуктуу өкүлдөрү, шаарлардын мэрлери, райондордун акимдери — «Аймактар»;

дин өкүлдөрү — «Ыйман»;

Кыргызстандагы чет мамлекеттердин элчилери – «Элчилер»;

ооруканалардын башкы дарыгерлери — «Ден соолук»;

окуу жайлардын директорлору, ЖОЖдордун ректорлору — «Билим»;

сот бийлигинин өкүлдөрү — «Фемида»;

күч түзүмдөрүнүн жетекчилери — «Коопсуздук»;

белгилүү спортчулар — «Спорт жылдыздары»;

Кыргыз Республикасынын элдеринин ассамблеясы, диаспора лидерлери — «Достук».Турнир сергек жашоо образын жайылтуу, өлкөдө футзалды таанытуу жана достукту бекемдөө максатында өтөт. Иш-чара Кыргыз футболдук союзунун жана президенттик администрациянын демилгеси менен уюштурулуп, жылына эки жолу өтөт.

Беттештердин графиги жана алардын трансляциясы тууралуу маалымат кийинчерээк жарыяланат.