Бишкек — Ош жолунун «Сосновка» көзөмөлдөө бекетинен жүк ташуучу унаалардын өтүүсүнө кечээ саат 23:30дан тарта чектөө киргизилди. Бул туурасында Транспорт жана коммуникациялар министрлиги кабарлады.

Маалыматка ылайык, тоолуу тилкелерге кар жап, жолдорго муз тоңуп, тайгалак болуп калган. Төө-Ашуудагы жолду кардан тазалоо жана инерттик материалдарды себүү иштери жүрүүдө. Ушундай эле жумуштар Ала-Бел, Көк-Бел, Өтмөк, Чапчыма жана башка ашууларда жасалып жатканы белгиленди.

Транспорт министрлиги мындай катаал аба ырайына байланыштуу айдоочуларга унаанын дөңгөлөктөрүн кышкыга алмаштырып, ашууларда тыгын жаратпоо үчүн каршы тилкеге чыкпай эреже менен айдоого чакырды.